Under treet i år

Inneheld eigenreklame

No har eg hatt eit par dagar av jobbpanikk der, de veit, ein får kjensla av at no er adventstiden øydelagt, sånn opphøgd som det kan bli når det er så viktig. Alt blir så viktig i desember. I går var me på Askøy heile dagen, i møter, Edda var verdens mest tålmodige baby og me åt oss gjennom Bakstehuset på Ask (reis dit!). I år har det vore så vanskeleg for meg å setta ord på kva eg ynskjer meg til jul, men eg har samla saman nokre fine ting her, i tilfelle de treng inspirasjon sjølve.

Det me ynskjer oss mest er meir juleservise frå Royal Copenhagen. Draumen er å kunna skifta ut heile serviset når desember kjem og berre bruka dette (ein tradisjon som bror til Jostein har og som eg syns er ein så himla koseleg adventsting). Langhåra saueskinn frå naboen, Ingrid Eri. På sikt skal me ha ein fin benk på kjøkenet, og eg vil ha skinn i den som ein kan legga seg ned og sovna i. Så deilig. Silkeskjerf frå Emma Fällmann, så eg kan lata som om eg er ei fin dame. Parfymen Bibliotheque frå Byredo. Me har duftlyset som ei konstant lukt i huset, og eg likar så godt tanken om å lufta likt som huset sitt, den assosiasjonen er så koseleg. Boka til My Feldt har eg lengta mot lenge, ønskar meg den til jul. Også det konstante, som eg alltid ynskjer meg: badebomber frå Lush. Har teke kanskje eitt bad sidan Edda vart født, og det er jo ein skandale!

Kva ynskjer de dykk i år? Om de ikkje heilt veit, så har eg laga fine gåveguidar for Fredag som eg linkar til -> her <-. Jostein er i butikken no og det blir sendt ut pakker klokka 14:30 i dag, og med posten i morgon. Hugs at me bør ha alle bestillingar inne til fredag 14.desember for å vera sikker på at dei kjem fram til jul

Tusen takk til alle som har kjøpt julegåvene sine hjå oss i år, forresten. Om eg tenkjer på det i meir enn ti sekund blir det storgrining. Så no trykkjer eg berre på publiser og lagar meg ein cappuccino. Ha ein fin fredag!

Solturistane

Forrige veke, medan det enda var sol på andre sida av elva, gjekk me ein tur, heile familien. Den var berre framme ei bittelita stund, men me fekk snu oss mot ho som blomar i vinduskarmen og reflektera over lyset og kva den gjer med oss. Her i Lærdal er sol rein valuta. Oppover i dalen vil dei fleste kunna fortelja nøyaktig dato for når deira spesifikke gard mistar sola for året, og når den kjem tilbake att om våren. Hjå oss reiser den 21. november og kjem tilbake 21. januar. Dette veit folk. Dette er sånt ein snakkar om på butikken. Spesielt i januar og februar, då er annakvar samtale prega av det. “Har de fått att sola no de?”. Og sånn går det. Nyleg var me på eit gravøl for sola her i bygda (nede i sentrum er sola ikkje å sjå frå seint haust til sein vår). Der fortalde ein mann i ein tale om mor si. Den første dagen med sol om våren, opna ho døra på vid gap for å sleppa sola inn. Eit så fint bilde, syns eg. Det skal eg òg gjera i 2019. Men først skal eg ruga på dei solstrålane eg har samla, og grotta meg inn i mørketida. For den er jo ikkje så verst, den heller.

Hei, desember!

Første desember. Berre å sei det får meg til å vibrera av alt det fine som ligg framfor meg. Noko som er så fint med å bli vaksen er at advent og romjul trumfar julaftan alle gonger. Også at det er så utruleg kjekt å GI gåver, eg kosar meg sånn med å laga lister og kryssa av (making a list and checking it twice, om du vil). Spesielt når eg no byrjar i oktober og sprer pengane mine litt. I år har eg kjøpt dei fleste gåvene lokalt, håndlaga, brukt eller smått. Føles så innmari godt, og ein gøyare måte å shoppa på óg. Nokre får såklart gåver frå min eigen butikk og det føles nesten som juks!

I dag tidlig fekk Saga opna si første kalendergåve i livet. Det var ei digg barnehagebukse frå Nøstebarn som ho trong og vart så kry for. Også krangla me når ho prøvde å dra ned fleire pakkar også sa me unnskyld. Toåringar som seier unnskyld er ganske så søtt, spør du meg. “Unnskyld mamma, eg sa uuunnskyyyyld mamma, sooorryyyy mammaaaa”

Eg har det ordentlig bra no, har så mykje ro og glede. I fjor desember var eg så kvalm og avstumpa og redd av å vera gravid, det er så fjernt no som Edda er her hjå oss på den mest sjølvsagte måten. Min perfekte andrebaby. Føler at eg verkeleg har fått landa i tobarnsmammarolla og i butikksjefrolla. Kan ha ei samanhang med at Edda har sove si første natt i eiga seng denne veka, det takkar eg ikkje nei til at ho kan gjera ein gang iblandt (vanligvis ligg ho på armen min). Akkurat no er eg i butikken, eg spelar deilig musikk og pakkar bestillingar. November var ein heilt utruleg månad for butikken, eg har hatt det så gøy og jobba så mykje. Og no er eg kampklar for desember.

Desember. Så fin månad.

I desember vil eg:

  • Baka meir med safran (eg har tjuvstarta allereie men kjøpte digg safran i London så eg er klar for denne sesongen!)
  • Gå på adventskos i barnehagen med heimebakte kjeks og sjokoladebollar
  • Henta Saga tidlig om eg føler for det
  • Laga takkekort frå dåpen til Edda og senda ut til dei som ho fekk fine gåver ifrå. Fredrik sin inskripsjon i boka ho fekk (Edda, den nye utgåva frå Samlaget) får meg nesten til å grina berre eg tenkjer på det
  • Sy hårstrikkar til butikken av alt det fine Liberty-stoffet som eg kjøpte i London
  • Drikka gløgg ad nauseum! Eplegløgg, raudvinsgløgg, vanlig kjedeleg gløgg. GLØGG.
  • Laga kransar til dørene våre av bjørkekvistar og tørka eukalyptus og tistlar som eg har på lur. Og eit silkebånd, kanskje?
  • Invitera fine folk på lavterskelmiddag på ein kvardag
  • Jobba jernet på det store prosjektet som Jostein og eg har innspurt på
  • Feira Henjatunet-boka som eg har fotografert og hatt design på!
  • Synga alle julesongar så dei sit som fjellstøypt til jul
  • Laga bananbrød så eg kan rista skiver av det og eta med espressomascarpone som på Pom og Flora
  • Kjøpa perler på finn.no og perla armbånd med Saga (ein bør kjøpa alt sånt på finn.no!)
  • Laga fuglemat av frø og feitt og henga opp på garden.
  • Kjøpa fleire lyslenker så det blir optimalt koseleg å køyra inn i tunet når det no er som mørkast.
  • Laga nellikappelsiner med Saga
  • Sjå Amalies Jul og Jul i Skomakergata
  • Legga adventsduk på bordet
  • Drikka den flaska med champagne som ligg i kjøleskåpet
  • Gjera om på heile spisskammerset vårt, som per dags dato ikkje fungerer. Trur eg har kjøpt løysinga på Ikea!
  • Læra meg å laga Sarah Bernard
  • Laga bøtter og spann med heimelaga frukostblanding som kan setta gullkant på kvardagar (slike er det jo óg i desember)
  • Bruka den eine frihelga eg har i desember på alt som er koseleg og julete
  • Laga julegåver ein kan eta og gi til små og store venner her i Lærdal
  • Legga inn ei herleg bestilling hjå Vinmonopolet i god tid før jul
  • Laga koselege gåveguidar for Fredag

Gode gåver

Gode gåver

Akkurat no sit eg i sofaen, Edda søv i fanget på ein sovande Jostein og Friends rullar forbi episode for episode på Netflix. No er det den der Rachel lagar dessert med kjøttdeig og erter. Så sjukt godt å berre å slappa heilt av ei lita stund no. I dag opna me butikk i Årdal! Det var enormt gøy, så mange fine folk innom! Og i morgon er ein ny dag!

Eg syns det er så godt å sjå at me er så mange små fine bedrifter som ikkje køyrer black friday, at me nektar å la oss sluka av det svarte holet. Så eg vil passa på å tipsa om nokre fine norske selskap der ein kan plukka opp julegåver til folk ein er glad i♥ 

Hald gjerne fram med å tipsa om andre norske nettbutikkar i kommentarfeltet, det er så fint med ein bank av slikt!

Lilli & Leopold

Fantastiske barneklede i merinoull, nettbutikk her.

Bakklandet blomster

Min enorme blomsterbutikk-crush i Trondheim som óg har nettbutikk. Eg har kjøpt eit par slike ringar til å laga blomsterkransar på i vinter! Mmm herleg.

Freywood

Så fine treprodukt at eg nesten kan lukta dei når eg ser på dei. Ahhh. Nettbutikk her.

Nora Brech

Norsk illustratør som selger prints i nettbutikken sin.

Studio Freckles

Linda lagar nydeleg keramikk på Studio Freckles. Eg har kjøpt ei slik ringskål i ei julegåve i år!

Petito

Eg handlar veldig mykje greier på Petito, føles så fint at det sit ei firbarnsmor på sørlandet og tek imot bestillinga mi. Nettbutikk her.

Fransk Bazar

Ein av mine favorittbutikkar i Oslo, elskar at dei óg har nettbutikk!

Skinkeape

MMmmm det er så digg med flinke norske illustratørar. Ønskar meg dette printet frå Skinkeape.

Tåke

Tåka låg tung i helga, så tung at ein ikkje kunne sjå noko anna enn det som var rett framfor seg. Av og til er det så godt, når naturen protesterar, seier “sjå. Sjå kva du har akkurat her”.

Me flyg rundt no, det er ei spanande veke. I morgon opnar me julebutikken vår i Årdal og i helga er det julemarknad og ei utstilling der eg stiller ut bilder frå to forskjellige prosjekt. På søndag skjer det ingenting, tenk det!

I morgon kjem eit blogginnlegg med alle mine finaste små nettbutikkar der eg kjøper julegåver og veit at pengane mine gjer gode ting for fine folk. Kan ikkje de legga igjen linkar om de har, til små bedrifter sine nettbutikkar? Så kan eg putta nokre av dei óg i innleggetLa oss alle bli meir bevisste på kvar me legg att kronene våre. Spesielt denne svarte veka. 

Fredagsbuketten

I går fekk eg ein bukett med blomar frå veslesyster mi, eukalyptus og nellik og bær (Marita på Blomsterbui her i Lærdal kjenner meg så vel). Så sjukt koseleg så det pirra i heile kroppen, ein blomsterbukett er så mykje meir enn berre stilkar i cellofan.

Den kjem til å setta gullkant på heile helga mi💗

No er eg i butikken, har sendt eit lass av møblar og varer til Årdal i dag. I neste veke opnar me, så spennande! Og no har eg fått inn sååå mykje meir varer som skal prisast og lagerførast. I morgon skal eg fotografera bryllaup, og det finaste er at det er bryllupet til Ragnhild og Pádhraic. Han teikna nyleg dei finaste plakatane for oss som me gler oss til å selga fram mot jul, de kan sjå dei her. 

På søndag fotograferer eg to sett med fine ungar, det er alltid så koseleg. Også, midt på søndagen, blir det HELG! Nokre timar med heilag fri før neste veka kjem og tek tak i oss ordentleg.

Håpar de har rofylte herlege førjulsveker. Snart er me der, tenk det. Med glitter og valnøtter og safran. Det skal bli saker, det.

November

På fredag feira me fjorten år saman, me gløymte det begge to til klokka var tre på dagen. To born under to og eit halvt gjer det med hjernen. Men me kjøpte gåver begge to, og det er jo noko!

Me sov fire i senga vår lenge, lenge, me sov på tvers. All reisingen og jobbingen, stresset, pressa seg fram i sprekkane våre, me fekk to døtre som trong å sova tett i tett om natta, helst med armar og bein floka saman med mine. Tåka er på veg til å letta no. I helga hang me opp ei lysslynge over heile rommet til Saga, og no gler ho seg til å legga seg der. «Lysrommet mitt», seier ho. Også les me den nye favorittboka hennar, om Stormkvalen og Noi.

Ho har prikkar over heile kroppen, mi vesle store jente. Ho har vore heime frå barnehagen i to veker no med vannkoppar. Ingen feber, berre kløande raude prikkar og to foreldre som har nok jobb til å fylla dagane.

Så me jobbar når me kan, ser meir Daniel Tiger enn me vil innrømma, eg skriv tekstar til sosiale media og oppdaterer nettbutikken klokka to om natta. Eg har aldri lengta så mykje til jul før som eg gjer i år. Jostein og Saga øver på julesongar, ho kjem til å kunna dei alle før desember.

Eg har mailinnboksen full av brudepar og familiar som vil ha meg og kameraet mitt på besøk, og det er så innmari innmari fint. At me flytta heim har betydd at eg får gjera det eg er best på, så mykje meir. Å vera ein større prosent fotograf. Det føles rett i magen. Spesielt når eg har kundar som skjønnar greia. At eg ikkje er ein sånn fotograf som vil at ungar skal sitta stille på ein stol. At eg vil vera med og leika, bygga tillit, og at bildene blir til på vegen.

Om ni dagar opnar me pop-up-butikk i Årdal, heimbygda mi. Me har fått leiga butikklokalet i LO sitt hus (sjølvsagt har LO sitt eige hus i Årdal, Arbeiderpartiet-kommunen over dei alle), og dei har pussa opp så nydeleg til oss. Det skal prisast hundrevis av varer før den tid, køyrast møbler inn, me skal rigga oss til og alt skal følast rett. Me har til og med fått sponsa julebrus frå Lerum (the one and only julebrus!), det blir pepperkaker, det blir mykje sveitte under panneluggen. Det er jo litt sinnsjukt å ha to butikkar i denne travle perioden, det er det. Men det er SÅ GØY. Og det var jo dette me starta butikk for, for å kunna gjere slike ting som er heilt på kanten av det som er rimelig. Og at eg igjen skal få sjå eit rom gå fra fire veggar til ein plass der folk kan utforska og drøyma og tenka på folk dei er glad i, dét er óg sinnsjukt. Sinnsjukt gøy.

Eg håpar det skal gå bra i Årdal, at me skal selga så mykje varer at me står litt friare i det nye året til å finpussa Fredag og utvikla vidare. Eg veit så mykje meir no om kven kunden er, og kva som er praktisk for folk å få tak i på éin og same stad. Eg har ei liste med merker eg klør etter å ta inn, og mantraet mitt er «2019. 2019. 2019».

Ting de vanligvis ikkje ser



Me har teke tre mus i huset den siste veka. Ein av oss går ned først for å sjekka fellene, så ikkje Saga skal snubla over daue dyr på veg til badet.

Det har vore så sprengkaldt at eg har drømt om å flytta til eit anna hus. Eg skrur opp ovnane, Jostein skrur dei ned att. Strømregninga blir trekt frå kontoen hass. Så istaden går me ilag og hentar ved, eg legg oppi bjørkeved når han ikkje ser det (det er den dyre veden, den som brenn lenge og godt).

Eg har fått varmepumpe i butikken. Og me har resirkulert papp. Sinnsjuke mengder papp. Og eg har ikkje eingong søppelavtale med kommunen. Så ein gong kanskje kvar tredje månad køyrer me eit lass med bos, eit bokstavleg lass, på dynga. 80 kroner kostar det.

Me passar hunden til svigers medan dei er i Italia, han er ein raring. Han vil ikkje eta og vil ikkje henta ball når dei er vekkreiste. Helst vil han ligga på varmekablane på badet eller i senga vår. Me har kjøpt kyllingfilet som me matar han og då et han.

Men no er det fredag. Eg er i butikken, det er travelt, det er godt, det er gøy. Eg pakkar bestillingar som ein gal, lagerfører som ein gal. No har me til og med toalett og kjøleskap her, eg har vore så kry når eg har handla eigen knekkebrødpakke, eige pålegg, oppvasksåpe, til kontoret.

Om eg orkar i kveld, skal eg pakka ut resten av kofferten frå turen til Bergen for to veker sidan. Hvis eg ikkje orkar skal eg fint klara å eta smågodt utan å tenka på den óg. Jostein og eg har éin episode att av Bodyguard på Netflix, og den har eg tenkt å sjå halvt bak ei pute. Og med mange episodar av Curb your enthusiasm som motvekt etterpå.